Jan nou gade yon moun fè li rive pran desizyon li pa ta menm sipoze panse ak yo. Jan moun kote Honoré ap viv la gade li fè l prèske pa anvi viv ankò. Lè BonDye mande l pou l al fè yon travay nan legliz sou kote li kouche a, misye pa vle paske l konnen moun yo pap vle resevwa li. Nan goumen li al fè travay la. Nan mitan travay la, nou jwenn li ap fè tout kalite aksyon ki fè nou ri e fache.

Ikennah, yon Ayisyen, yonn nan gran doktè k ap travay andedan lopital Grace ki nan Chikago ap chache yon madanm. Nan chache li rive Ayiti kote li kontre ak Mélodie, yon agronòm konpetan k ap travay ede peyizan yo. Men Mélodie gen yon dyaspora, Silabon, yo te depòte k ap koze ak li depi misye rantre. Ikennah goumen anpil, men èske l ap rive goumen ak Silabon pou l jwenn Mélodie. Yon bèl fim k ap fè nou fache, kontan, e mete lajwa nan kè nou.

Léandre e Lensky, de jimo ki fèt Ayiti, andedan lopital jeneral e ki separe menm kote a. Léandre rete viv Ayiti e moun ki vòlè Lensky a pati al viv ak li nan peyi lòt bò dlo. Lensky pa janm konnen vrè papa l ak manman l. Lavi Lensky e Léandre diferan yonn de lòt. Lakòz yon koneksyon yo genyen nan kòd lonbrit yo, yonn santi sa lòt la ap soufri. Èske y ap rive kontre e rezoud problèm nan. Fim sa a rale anpil emosyon nan nou. Fè nou fache, ri jouk vant nou fè nou mal.

Se yon koup ki marye depi dis ane e k ap goumen. Malgre tout konsèy pastè yo, yo paka padone yonn lòt pou yon bagay ki te pase nan mitan yo lè yo te fenk marye. Se vire tounen y ap diskite. Èske y ap rive padonen yonn lòt e viv nòmalman tankou mari e madanm. Se yon fim ki fè nou wè jan nou sispoze kolabore yonn ak lòt e mete anpil kè kontan nan mitan nou.

Lavi Shandrillon se lavi pifò timoun k ap viv sou latè. Tout timoun ta renmen jwenn yon pwens ou yon prennsès pou vin ede yo nan sitirasyon difisyl yo. Shandrillon pèdi manman l ak papa l bonè. Se ak bèlmè l e de pitit manmzèl yo li rete. Bèlmè a fè li pase anpil mizè. Men kon Khiyarly, yon jenn gason Ayisyen k ap viv nan peyi lòtbò dlo, Kalifòni espesyalman, wè li, misye tonbe damou li. Men bèlmè Shandrillon an derefize kite mesye dam yo rete ansanm. Ki jan Khiyarly pral fè pou l pale e rete ak Shandrillon?

Se istwa de jenn fi ki grandi andedan legliz Sen Thetée anba ddireksyon doktè Dieudonne men ki renmen danse. Yo vin tande gen yon konpetisyon dans gwoup Nwaebèl ap fè pou tout moun ki enterese. Yo anvi antre nan konpetisyon an, men pa gen moun ki vle kanpe ak yo. Alafen, yo deside antre nan konpetisyon an pou kont yo. Se lè a kèk moun kanpe ak yo aprè anpil pale. Fim sa ap fè moun ri, kriye, fache e kontan.